Ikinyamakuru Daily Monitor kitegamiye kuri leta ya Uganda, cyasubiyemo amagambo ya David Bahati, umunyamabanga wa leta muri minisiteri y’imari ya Uganda, avuga ko iki gihugu kitazongerera igihe impushya za kompanyi z’imikino y’amahirwe mu rwego rwo kuyica.
Bwana Bahati yavuze ko ari itegeko ryatanzwe na Perezida Yoweri Kaguta Museveni w’iki gihugu.
Yongeyeho ko Perezida Museveni yatanze iryo tegeko kubera ingaruka mbi imikino y’amahirwe iri kugira ku rubyiruko.
Yagize ati: "Twahawe amabwiriza na Perezida [Yoweri] Museveni yo guhagarika guha impushya kompanyi z’imikino y’amahirwe no kuraguza umutwe. Perezida ubu yahaye amabwiriza akanama kayigenzura".
Rimwe mu maduka bakiniramo imikino y’amahirwe i Kampala
Gukina imikino y’amahirwe kuri shampiyona y’umpira w’amaguru mu Bwongereza, Premier League, bireze muri Uganda kandi bikomeje kwiyongera
Mu mwaka wa 2017, BBC yatangaje ko urubyiruko rwinshi muri iki gihugu rudafite akazi rugana imikino yo kuraguza umutwe rwizeye kubona imibereho.
Bwana Bahati yabwiye abitabiriye amasengesho yo ku cyumweru mu rusengero rw’ahitwa Rugarama Hill mu mujyi wa Kabale ko "kuva ubu, nta kompanyi nshya zizongera guhabwa uruhushya. Izisanzwe zikora, ntizizongererwa uruhushya igihe zahawe nikirangira".
Yavuze ko abakuru b’amadini, bamye barwanya imikino y’amahirwe, ubu noneho bakwiruhutsa kuko "amasengesho yabo yumviswe".
