Mutungirehe Samuel
Umugore w’Umwiraburakazi, Sasha Johnson, uzwi mu nkundura yo guharanira uburenganzira bw’Abirabura mu Bwongereza, mu kiswe #BlackLivesMatter, yarasiwe i Londres.
Inkundura ya #BlackLivesMatter yadutse umwaka ushize muri Amerika ubwo umupolisi w’Umuzungu yicaga akandagiye ku ijosi ry’Umwirabura George Froid, agapfa abuze umwuka, bituma abirabura bahatuye batera hejuru ko nubundi bakorerwa ihohoterwa n’iyicwa rya hato na hato bitewe n’irondaruhu rikorerwa Abirabura.
Iyi nkundura yageze henshi ku isi harimo no mu Bongereza ku mugabane w’Uburayi aho itahwemye kugaragara mu buryo butandukanye.
BBC yanditse ko kuri iki cyumweru ari bwo Sasha Johnson wari uyoboye abagize iyo nkundura mu Bwongereza yarashwe n’abataramenyekana, ubu ubuzima bwe bukaba buri mu Mana na muganga.
Ishyaka rye rya Taking the Initiative Party, ryavuze ko arwariye mu ndembe guhera kuri iki cyumweru ubwo yari amaze kuraswa mu ruturuturu.
Iraswa rya Sasha ryabere mu karere ka Southwark kari mu Majyepfo y’Umurwa Mukuru Londres ku isaha ya saa cyenda z’ijoro aho mu Bwongereza.
