Mu murenge wa Janja mu kagari ka Gacyindo hari ikibazo cy’amashanyarazi ugasanga abagore n’abagabo batumvikana bitewe nuko abagore bajya gukoresha imisatsi kure yaho batuye baza bagasanga abagabo babakingiranye, n’abagabo iyo bagiye gushaka umuriro wo muri terefone abagore babo bavuga ko babaharitse (bafite abandi bagore) .
Abaturage bavuga ko amacyimbirane yo mu muryango aterwa n’impamvu nyinshi none hiyongereyeho niyo kujya gushaka umuriro kuko iyo bavuye mu kagari ka Gacyindo abashaka gucomeka terefone bagenda amasaha abiri bajya aho uri ku murenge wa Janja kugerayo bitwara amasaha abiri kugenda gusa n’abagore bajya gukora imisatsi nuko hakiyongera n’amasaha bamara bayikora bakagera mu rugo bwije bagasanga abagabo bakinze bakarara hanze amacyimbirane agatangira ubwo.
Nyirakabuga Ader atuye mu mudugudu wa Kibonwa mu kagari ka Gacyindo avuga ko amacyimbirane ashingiye kwibura ry’umuriro ari menshi.
Yagize ati “Niba dufite ikibazo cy’umuriro cyakuruye intambara hagati y’abagore n’abagabo bapfa gutinda gutaha kandi bagiye gushaka umuriro k’umurenge wa Njaja kuva aha ujyayo bitwara amasaha menshi ku buryo atarahantu wanyarukira abagabo bo bagerayo bakanywa n’inzoga bagataha bucya abagore bakagira ngo yacyuye undi mugore n’abagore nuko iyo bagiye gukora imisatsi bataha mu gicuku bagasanga abagabo bakinze bakabaraza hanze bwacya bakabirukana bavuga ko ari indaya ngo aba yagiye mu bagabo kandi arengana ikibazo ari umuriro.”
Nyirakabuga akomeza avuga ko bakwiye kubona umuriro nabo bakabona iterambere bikabarinda intambara zo mu miryango zikomoka ku kubura umuriro.
Rutayisire Ezechiel atuye mu kagari ka Gashamba avuga ko bagowe no kutagira umuriro yagize ati “Tugowe no kubona aho twiyogoshesha tugenda amasaha arenga abiri tujya gushaka umuriro, iyo tugezeyo hari igihe tubanza no gucaginga terefone ugasanga ijoro riraguye twagera mu rugo umugore akagira ngo mfite undi mugore bigaterera ibazo.”
Bizimana Werarisi ni Umunyamabanga Nshingwabikorwa w’akagari ka Gakindo avuga ko ikibazo cy’umuriro kizwi n’ubuyobozi icyo atarazi ni amakimbirane akomoka ku kubura umuriro ariko barimo kugishakira igisubizo.
Yagize ati “Abaturage bafite ikibazo cyo kutagira umuriro turabizi ariko ntabwo twari tuziko abagabo n’abagore babipfa kuko umwe yagiye gushaka umuriro cyangwa gushaka serivisi zibikomoka ku muriro, akarere ka Gakenke karabizi gateganya ko mungengo y’imari ya 2019-2020 hateganyijwemo ko umuriro ushobora kwigira hafi y’abaturage nko mugasantire. Uko ubushobozi buzaboneka ukazabageraho no mu ngo zabo, ntabwo twavuga ngo tuzawugeza muri buri rugo ariko urumvako uzaba uri hafi yaho bawukurura ukagera mu ngo.”
Ibi biravugwa mu gihe ku munsi mpuzamahanga w’abagore wizihijwe 8 Werurwe 2019 insanganyamatsiko yagiraga iti “ Dufatane urunana twubake umuryango utekanye”.
