Yashyizweho na Imfurayabo Pierre Romeo
Urwego rw’Igihugu rw’Imiyoborere (RGB) ku bufatanye n’Ishami ry’Umuryango w’Abibumbye rishyinzwe iterambere (UNDP), batangaje imishinga 65 y’imiryango itari iya Leta yatsindiye miliyari imwe na miliyoni 685 FRW, izifashisha mu kuzana iterambere n’impinduka mu buzima bw’abanyarwanda.
Ni mu marushanwa yatanzwemo imishinga 288 guhera ku wa 19 Werurwe kugera ku wa 26 Mata 2019, itoranywamo 65 igaragaza kuzana impinduka mu banyarwanda kurusha iyindi.
Muri iyo mishinga yatsinze harimo itatu ijyanye n’ubushakashatsi, buri umwe uzahabwa miliyoni 45 Frw, isigaye 62 buri umwe uhabwe miliyoni 25 FRW.
Nyuma yo gutangaza iyatsinze amarushanwa, RGB yavuze ko ku ikubitiro imishinga 27 izahita ihabwa amafaranga igashyira mu bikorwa ibyo yateganyije, isigaye nayo ikazagenda iyahabwa buhoro buhoro.
Umunyamabanga Nshingwabikorwa w’umuryango w’abamugariye ku rugamba n’abandi bafite ubumuga, Habimana Louis, yavuze ko ayo mafaranga azatuma abo ayobora bagira uruhare mu iterambere.
Ati “Ibikorwa tuzakora ni ukuzamura imibereho y’abamugariye ku rugamba n’abandi bafite ubumuga binyuze mu kubigisha imyuga kugira ngo nabo bashobore kwiteza imbere binyuze mu kwihangira imirimo.”
Uwo mushinga biteganyijwe ko uzafasha abarenga 100 bo mu Karere ka Burera na Musanze.
Komiseri ushinze ibikorwa by’umuryango w’Aba-Scout mu Rwanda, Rucyahana Viateur, yagize ati “Umushinga wacu ugamije guteza imbere imyuga mu rubyiruko muri Remera-Ruhondo (Mu Karere ka Burera) no muri Nyaruguru. Uzigisha abantu 160 ibijyanye n’ubudozi no kubaza.”
Umuyobozi Mukuru wa RGB, Dr. Usta Kaitesi, yashimiye imiryango itari iya Leta yose yitabiriye amarushanwa avuga ko itagize amahirwe yo gutsinda ari umwanya wo gukosora ibisabwa itari yujuje.
Ati “Abatsinze bakwiye gushimirwa ku mwanya batanze wo gukusanya ibitekerezo n’imishinga izagira uruhare mu kuzana impinduka mu iterambere ry’igihugu.”
Dr Kayitesi yavuze ko “Imishinga yatoranyijwe ni izagira ingaruka nziza ku baturage, ari ukubahindurira imyumvire, kububakira ubushobozi mu bintu bitandukanye n’ikindi gikorwa cyagira impinduka ku buzima bwabo.”
Dr Kaitesi yasabye abatsindiye iyo nkunga kuyikoresha neza kugira ngo ibikorwa bayisabiye bigere neza ku bagenerwabikorwa kandi bakagaragaza ubunyangamugayo.
Igikorwa cyo guha inkunga imiryango yigenga mu Rwanda gikozwe ku nshuro ya gatatu guhera mu 2014. Icyo gihe gitangizwa mu mishinga 182 yitabiriye, iyagize amanota ari hejuru ya 70 % ni imishinga 45, mu 2017 hitabiriye imishinga 199, iyagize amanota ari hejuru ya 70% ni 75 naho uyu mwaka mu mishinga 288 hahembwe 65.
Inkuru dukesha IGIHE
