Nyuma yo kugaragaza ko utandukanye n’indi mitwe y’inyeshyamba, haba mu bushobozi n’intego mu mitwe ikorera mu mashyamba yo mu Burasirazuba bwa Congo, M23 yatagaje ko igiye gusubira inyuma ndetse igasubiza Leta tumwe mu duce yari yarafashe.
Ubuyobozi bwa M23 bwaraye butangaje ko uyu mutwe ugiye guhagarika intambara ukava no mu bice wigaruriye. Icyakora uracyasaba ibiganiro n’Umuhuza mu bibazo bya DRC.
Si ubwa mbere usabye ibi biganiro ntibyemererwe ndetse ntiyanabonetse mu bimaze icyumweru bibera i Nairobi bihuza Umuhuza Uhuru Kenyatta n’imitwe igera kuri 40 ikorera muri Congo.
Mu itangazo ryaraye risohowe n’uyu mutwe rigasinnywaho n’Umuvugizi wayo mubya politiki witwa Lawrence Kanyuka, M23 ivuga ko yasanze igomba guhagarika imirwano, ikava mu birindiro yari yarashinze aho yafashe.
Kanyuka yasinye avuga ko gukora ibikubiye muri ririya tangazo biri mu rwego rwo kubahiriza ibikubiye mu masezerano y’i Luanda n’ubwo batayitumiwemo.
Taliki 23 Ugushyingo, 2022 nibwo iyi nama yateganiye i Luanda muri Angola.
Umwe mu myanzuro yahafatiwe wavugaga ko M23 igomba gushyira hasi intwaro ndetse igasubira inyuma iva mu bice yari yarigaruriye.
Harimo interuro ivuga ko M23 igomba gusubira muri Sabyinyo, ariko abayobozi bayo basubije ko M23 itagizwe n’ingagi kuko ari zo ziba mu birunga.
