Yanditswe na Ndayambaje Jean Claude
Nyuma yo kwibaruka abana batatu Nyiranzabonimpa Jullienne w’imyaka 28 utuye mu karere ka Musanze, umurenge wa Cyuve, akagari ka Kabeza, umudugudu wa Karinzi yijejwe n’ubuyobozi bw’Akarere ndetse n’abandi bafatanyabikorwa ko bazakomeza kumuba hafi.
Uyu mubyeyi wakoraga akazi kubuzunguzayi asanzwe atuye mu kagari ka Kabeza umudugudu wa Karinzi.
Ku Gicamusi cyo kuri uyu wa kane tariki ya 22 Kamena 2023 ababyeyi bagize itorero Fatherhood Sanctuary bari kumwe n’umuyobozi w’Akarere ka Musanze wungirije ushinzwe imibereho myiza y’abaturage Kamanzi Axelle basuye uyu mubyeyi ku bitaro bya Ruhengeri bamusigira ubufasha butandukanye burimo n’ibikoresho by’isuku.
Mu kiganiro Nyiranzabonimpa yagiranye n’umunyamakuru wa mamaurwagasabo yavuze ko nta bushobozi bwo kurera aba bana afite ngo kuko yari atunzwe no gukora ubuzunguzayi ndetse ngo umugabo we babanye mu buryo butemewe n’amategeko akaba ariho ahera asaba ubufasha bwihariye.
Yashimiye ababyeyi baje kumusura abasabira imigisha ku Mana.
Yagize ati: "Ndishimye cyane kubona umuyobozi wacu mu karere yafashe umwanya akaza kunsura hano mu bitaro, ndashimira cyane kandi ko bamfashije kubona ibikoresho bitandukanye bizamfasha kwita kuri aba bana b’impanga. Nakoraga akazi ko kwikorera akabase muri uyu mugi, ubu nkomeje kwibaza uburyo nzarera aba bana bane bose ntacyo kubaha mfite."
Yakomeje agira ati: "Mu buzima busanzwe nta kuntu mpagaze, mfite umugabo ariko ntabwo tubana yashatse undi mugore rimwe ajya aza mu rugo, ndasaba ubufasha kuko ubu kuzunguza birahagaze."
Uyu mubyeyi akibwirwa ko atwite abana batatu, ngo kwiyakira byaramunaniye.
Ati: "Nabwiwe ko ntwite abana batatu kwiyakira birananira, kuko natekerezaga uburyo nzabarera, n’ubu nicyo nkomeje kwibaza, ndasaba ubuyobozi kugira ngo njye mbona uburyo nabagaburira kuko nta bushobozi mfite."
Ingabire Jeanne D’Arc, ahagarariye ababyeyi bateye intambwe yo kumugeraho baturutse mu yitorero rya Fatherhood Sanctuary yavuze ko umutima wo gufasha basanzwe bawufite.
Akomeza agira ati: "Burya itorero ntabwo rigarukira mu gusenga gusa ahubwo itorero ni ibikorwa, niyo mpamvu nyirizina twaje hano kugira ngo twifatanye n’uyu mubyeyi kandi tuzakomeza tumube hafi, nkuko bisanzwe Fatherhood Sanctuary ikorera mu murenge wa Cyuve, dukwiye gukomeza gukora umurimo w’Imana ."
Umuyobozi w’Akarere ka Musanze wungirije ushinzwe imibereho myiza y’abaturage Kamanzi Axelle yavuze ko abana bavutse ari ab’akarere ariyo mpamvu bazakomeza kuba hafi uwo mubyeyi.
Yagize ati: "Mu byukuri iyo umuntu atwite umwana aba ateganya kubyara umwana umwe, ariko hari igihe Imana igutungura ugasanga utwite umwana urenze umwe, umubyeyi nk’uyunguyu uba ubyaye abana batatu kandi adafite ubushobozi tuba tugomba kumwitaho kugira ngo abana bakure neza."
Kamanzi Axelle, wambaye ikanzu itukura
Visi meya Kamanzi Axelle akomeza agira ati: "Nyuma yo kuva hano mu bitaro tuzakomeza tumukurikirane, tumube hafi tumufashe dufatanyije n’abafatanyabikorwa batandukanye nkuko uyu munsi twabikoze, hari gahunda zitandukanye zunganira ababyeyi bafite abana badafite ubushobozi bwo kubitaho, kuko guca inshuro ntabwo bizaba bimworoheye. We afite abana batatu, kuba abana bavukiye mu muryango utishoboye ntibizaba intandaro yuko abana bashobora kuzagira ikibazo cy’imibereho, tuzakomeza kumwitaho."
Abana bose uko ari batatu baje biyongera kuri undi umwe yari afite. Kuri ubu bameze neza mu bitaro bikuru bya Ruhengeri muri Neonatology, umwe yavukanye amagarama 2,100, ubwakabiri avukana 1,800 mu gihe uwagatatu yavukanye 1,700.
Undi mugiraneza wese wakwifuza kumusura amarembo arakinguye.
