Yanditswe na Mutungirehe Samuel
Video y’ikiganiro kirambuye: https://www.youtube.com/watch?v=pzBl9YhJh8A&t=166s&ab_channel=MAMAURWAGASABOTV
• Perezida wa Ibuka mu murenge wa Rugerero we yamukubise amaso atangira guhahamuka
• Se w’uriya mutetsi ari mu abje kwica Se wa Perezida wa Ibuka/Rugerero
• Nyina w’uriya wamwohereje yakoze Jenoside
• iryo shuri ryaguyemo abana barenga 12 muri Jenoside yakorewe Abatutsi mu 1994.
Hashize iminsi mu binyamakuru no ku mbuga nkoranyambaga hacicikana inkuru y’umutetsi, wamenyekanye nk’UMUKWIKWI watumwe n’Umuyobozi ku rwego w’Umurenge wa Rugerero ngo amuhagararire mu muhango wo Kwibuka Jenoside yakorewe Abatutsi mu 1994, umuhango wo gusoza iminsi 100 Jenoside yamaze, wabereye ku kigo cy’Amashuri College Inyemeramihigo giherereye muri uwo murenge.
Byatangiye ku itariki ya 3 Kamena 2022, ubwo umukozi ushinzwe uburezi mu Murenge wa Rugerero, Nyiraneza Esperance yasabwaga n’Umunyamabanga Nshingwabikorwa w’uwo murenge kuza guhagararira umurenge mu muhango wo Kwibuka ku nshuro ya 28 muri College Inyemeramihigo riherereye mu Murenge wa Rugerero.
Uwo mukozi nawe yaje kubura uko ajyayo atuma uwitwa Mbarushimana Jean Claude ushinzwe gutekera abanyeshuri ngo ahamubere mu izina ry’umushyitsi mukuru muri uwo muhango.
Ikibazo cyaje kuba ubwo uwo mugabo, usanzwe ari na Mudugudu, akaba n’umutoza w’intore ku rwego rw’umurenge, yajyaga gushyira indabo ku rwibutso rwa Jenoside abari aho bamwe bagatangira guhahamuka bitewe n’ibyo bamuziho, nk’uko Perezida wa Ibuka ku rwego rw’igihugu yabitanagrije Mamaurwagasabo TV.
Nkuranga Egide, Perezida wa Ibuka yavuze ko iryo shuri ryaguyemo abana barenga 12 muri Jenoside yakorewe Abatutsi mu 1994. Ubwo haberaga umuhango wo kwibuka umuyobozi w’akarere ka Rubavu, Kambogo Ildephonse yari yagennye Umuyobozi w’Umurenge wa Rubavu kujya guhagararira akarere muri icyo gikorwa.
Umuyobozi w’Umurenge nawe ariko yari mu gikorwa cyo gusezeranya abagenzi ku murenge nawe atuma Nyiraneza Esperance, umukozi w’umurenge ushinzwe uburezi.
Akomeza agira ati, “Noneho Nyiraneza nawe, ku mpamvu atagaragaje nawe atuma umuntu w’umutesi, numva bamwita Umukwikwi, mu ishuri ry’Inyemeramihigo, agenda ari nkawe uhagarariye umurenge, mbese anahagarariye n’akarere, niko navuga, uba ugomba kuba Umushyitsi Mukuru.
Noneho agezeyo, ako kanya Perezida wa Ibuka mu murenge wa Rugerero amukubise amaso n’abarokotse Jenoside bari aho bamuzi batangira guhita bahahamuka. Kubera iki? Icya mbere kubona umushyitsi mukuru uje guhagararira ubuyobozi mu gikorwa nka kiriya cyo kwibuka kuba bamuzi ko ari umutetsi, ubwacyo nawe urumva ko kidakwiye.”
Ikindi Perezida wa Ibuka Nkuranga Egide yavuze ni uko nyina w’uriya mukozi w’umurenge nawe yakoze Jenoside, hakaba na musaza we uba hanze uvuga nabi u Rwanda.
Umuyobozi w’akarere ka Rubavu, Kambogo Ildephonse, nawe yavuze ko ucyumva ikibazo ubwacyo ari ipfobya rya Jenoside ryabayeho.
Ati “Ikiba gisigaye rero ni ugukurikiranwa umuntu wese waba waba yaragize uruhare muri kiriya gikorwa ari nabyo ubungubu birimo gukorwa.”
Umuyobozi w’akarere asobanura ko uwo ari we wese wagize uruhare mur ikiya gikorwa cyo gupfobya Jenoside agomba gukurikiranwa. Ati “Nonese barakubwira ngo uhagararire uri mu ruhe rwego, ubyemera ute? Reka mvuge ko bagushyizeho Pressure, ibyo wabyumva ute; ujya guhagararira nkande?”
Kugeza ubu abavugwa muri iki kibazo,yaba umukozi w’umurenge n’uwo mutetsi batawe muri yombi kugira ngo bakurikiranwe ku byakozwe bigize icyaha cyo gupfobya Jenoside yakorewe Abatutsi.
Ikiganiro cyose wagikurikira unyuze hano:
https://www.youtube.com/watch?v=pzBl9YhJh8A&t=166s&ab_channel=MAMAURWAGASABOTV
