Ikigo cy’igihugu gishinzwe gukurikirana amakoperative, RCA, kizihije umunsi mukuru wahariwe Amakoperative, gikangurira urubyiruko kurushaho kwibumbira mu makoperative kuko ari kimwe mu bizamura ubuzima bw’abanyarwanda.
Kuri uyu wa 14 Nyakanga nibwo RCA kizihije umusni mukuru w’amakoperative mu Rwanda wizihirijwe mu karere ka Rubavu, mu murenge wa Mudende.
Ubuyobozi bw’Ikigo k’Igihugu cy’Amakoperative, RCA, butangaza ko mu Rwanda habarurwa amakoperative asaga 9000, muri ayo asaga 80% akaba akora neza.
Mu kwizihiza umunsi mpuzamahanga w’amakoperative hashimiwe amakoperative agera kuri 3 yabaye indashyikirwa mu gihugu, aho andi yasabwe gukomeza gukora cyane ngo abe bandebereho.
Umuyobozi mukuru wa RCA, Prof. Harelimana yagize icyo avuga kuri uyu munsi mukuru ati “Bafatanyabikorwa nimudufashe dukore uko dushoboye duteze amakoperative imbere ndetse n’abanyamuryango bayarimo bagere kw’iterambere rirabye”
Umuyobozi Mukuru w’Ikigo k’Igihugu cy’Amakoperative Prof. Harelimana Jean Bosco yabigarutseho ejo hashize tariki 14 Nyakanga 2018 mu karere ka Rubavu, ubwo hizihizwaga Umunsi mpuzamahanga wahariwe amakoperative.
Yavuze ko mu gihugu hari amakoperative asaga ibihumbi 9. Muri ayo, asaga 80% akora neza, naho 18% akaba ari amakoperative akora neza mu rugero, mu gihe 2% ari yo afite ibibazo byinshi. Gusa ngo mu rwego rwo kubafasha bashyizemo imbaraga nyinshi ngo ibibazo aya makoperative afite bikemuke, anongere umusaruro.
Prof. Harelimana yasabye amakoperative kugira uruhare mu guteza imbere igihugu, abaturage bose bakangurirwa kwibumbira hamwe mu rwego rwo gukomeza guteza imbere igihugu.
Yavuze ko kugeza ubu hakomeje kuvugurura inzego z’imiyoborere y’amakoperative, aho bahereye ku y’abamotari n’andi amakoperative yagiye arangwa n’imiyoborere mibi yateye igabanyuka ry’umusaruro.
Ati: “Imbaraga zikomeje gushyirwamo zizafasha mu gutuma umusaruro wiyongera koperative ziteze imbere, abanyamuryango ndetse n’igihugu muri rusange. Kuri ubu inzego z’abahinzi b’ibirayi zaravuguruwe kugira ngo bifashe abanyamuryango. Mu rwego rwo gushaka uko umusaruro wakwiyongera, mu micungire y’amakoperative turi kwinjizamo ikoranabuhanga, twasanze amakoperative ari inyuma akenshi byatewe n’imicungire mibi, ubu turi kuzenguruka igihugu tureba uko ibibazo byakemurwa kandi ntibizatinda”.
aganira n’itangazamakuru, Guverineri w’intara y’iburengerazuba Munyantwari ahamya ko kubaho ari ukubana kuko igikorwa cyakorwa n’abantu bishyize hamwe kigerwaho kandi nta kibananira, kandi ko ubutumwa bubwiwe abantu bishyize hamwe bugenda byihuse.
Agira ati: “Ndasaba amakoperative yose ko yagira intego ihamye kandi iramba, kugira ngo ibyo dukora bigire aho bitugeza dukwiye kubikora twihaza tunasagurira amasoko. Kuri ubu duhanganye no kongera umusaruro, kandi birashoboka.
Ndasaba abahinzi n’abandi bibumbiye hamwe kwiyemeza bagashyira umutima ku byo bakora, amafaranga aboneka mu makoperative niyifashishwe mu bikorwa byo gufasha amakoperative kwifasha. Dufite ubuhamya bw’ibintu byagezweho bitapfa kwisukirwa n’umuntu umwe, byose biragaragaza ko abishyize hamwe nta kibananira.”
Ntibitura Modeste, Perezida wa Koperative y’abafashamyumvire yo mu karere ka Rubavu, imwe mu makoperative yashimiwe ku bwo kuba indashyikirwa, yavuze ko kuri ubu bishimira ibyo bamaze kugeraho babikesha kwibumbira hamwe kandi ko biteguye kongera umusaruro.
