Madamu Jeannette Kagame yagaragaje ko inzego zitandukanye zikwiye gufatanya mu gushaka ibisubizo by’ibibazo bibangamiye uburenganzira bw’abana, anasaba ko mu igenamigambi uturere dukora hakongerwamo gahunda mbonezamikurire y’abana bato.
Ibi yabigarutseho kuri uyu wa Gatandatu mu birori byo kwizihiza umunsi wahariwe Umwana w’Umunyafurika, wahujwe n’umunsi mpuzamahanga wo kurwanya imirimo mibi ikoreshwa abana, byabereye mu Murenge wa Nemba mu Karere ka Gakenke.
Ni umunsi wari ufite insanganyamatsiko igira iti “Twitabire gahunda y’imbonezamikurire y’abana bato, dutegure ejo heza h’u Rwanda.”
Madamu Jeannette Kagame yavuze ko kwizihiza neza iyi minsi uko ari ibiri, bikwiye kujyana no guharanira uburenganzira bw’umwana no kurwanya inzitizi zose zabangamira imikurire ye, ari nabyo bimufasha kuba umwana wizihiwe kandi wagutse mu mitekerereze no mu myumvire.
Yagize ati “Nk’uko mubizi iyo umwana yitaweho mu myaka ibanza y’ubuzima bwe kuva agisamwa bimufasha gukura neza, afite igikuriro kijyanye n’ikigero cye, ubumenyi buhagije bujyanye n’ikigero cye, kwiga neza no kumenya kugenzura amarangamutima ye bitewe n’ibihe arimo bityo umwana akitegura neza kuzaba umuntu mukuru uzagirira akamaro umuryango we n’igihugu.”
Yagaragaje ariko ko uyu munsi hashyizweho urwego mpuzabikorwa rwa gahunda mbonezamikurire y’abana bato rwabashije guhuriza hamwe abafatanyabikorwa bose bagira uruhare muri iyi gahunda, asaba ko irushaho guhabwa ubushobozi.
Yakomeje agira ati “Mu gihe hakorwa igenamigambi ry’akarere n’izindi nzego ni ngombwa ko duteganyiriza gahunda mbonezamikurire y’abana bato kuko ari cyo gishoro gikomeye kizadufasha kubaka u Rwanda rufite ubukungu buhamye bishingiye ku bumenyi bw’abana barwo.”
Yasabye ko abana barindwa imirimo ivunanye
Madamu Jeannette Kagame yavuze ko kugira gahunda y’imbonezamikurire y’abana bato atari ukugira urugo rwo kubashyiramo gusa, ahubwo ari serivisi zikomatanyije bahabwa bikagirwamo uruhare n’ababyeyi bombi, umugabo n’umugore.
Yashimangiye ko abana ari ab’agaciro kandi igihugu kibatezeho byinshi, bityo bakwiye kurindwa imirimo mibi, anabibutsa ko imbaraga ababyeyi n’abarezi bashyira mu kwita ku burere bwabo no kubashakira ubuzima bwiza zitatanga umusaruro batabigizemo uruhare.
Yakomeje agira ati “Ni ngombwa ko umwana arindwa imirimo mibi kuko ishobora kumutera ihungabana, kubangamira uburenganzira bwe bwo kwiga, gukina n’ibindi akenera kugira ngo akure neza.”
Inyigo yakozwe na Minisiteri y’abakozi ba Leta n’Umurimo mu gihugu hose kuva mu mwaka wa 2016, abana 8383 bakuwe mu mirimo itandukanye basubizwa mu ishuri no mu miryango yabo, mu gihe abakoresha 396 bari abakoreshaga abana imirimo mibi yiganjemo ubuhinzi.
Madamu Jeannette Kagame yibukije ababyeyi kuganira n’abana, kubatoza kuyobora ibitekerezo byabo neza no guhora bashakisha igishya mu guteza imbere umuryango hakoreshejwe ikoranabuhanga no gusangiza abandi ubumenyi bafite, byo bizabafasha kubaka u Rwanda na Afurika bifuza.
Bamwe mu baturage bagaragaje ko gahunda mbonezamikurire zashyizweho zigenda zitanga umusaruro, bashingiye ku kamaro k’amasomo bagiye bahabwa binyuze muri izo gahunda.
Mu buhamya bw’umuryango wa Uwizeyimana Papias na Uwimana Josephine bagaragaje ko binyuze muri gahunda y’Urugo mbonezamikurire bize kwita ku isuku y’umwana, kwita ku mirire no gutegura indyo yuzuye n’uko bagomba gufatanya mu kurera umwana.
Minisitiri w’Uburinganire n’iterambere ry’Umuryango, Nyirasafari Espérance, yasabye ko ingo mbonezamikurire zakomeza kwegerezwa abaturage kugeza no muri buri kagari. Kugeza ubu mu Rwanda hari izigera ku 4100.
Iki gikorwa cyitabiriwe n’abayobozi bandi barimo Minisitiri w’Ubutaka n’Amashyamba, Tumushime Francine; uw’Ubutegetsi bw’Igihugu, Francis Kaboneka; Umuyobozi wa UNICEF mu Rwanda, Ted Maly; abakuru b’Ingabo na Polisi ndetse n’abandi bafatanyabikorwa ba leta muri gahunda yo guteza imbere imibereho myiza y’abana.
Minisitiri w’Uburinganire n’iterambere ry’Umuryango, Nyirasafari Espérance, yasabye ko ingo mbonezamikurire zakomeza kwegerezwa abaturage kugeza no muri buri kagari
Madamu Jeannette Kagame ari kumwe na Minisitiri w’Uburinganire n’Iterambere ry’Umuryango, Nyirasafari Esperance n’Umuyobozi w’Akarere ka Gakenke , Nzamwita Deogratias
Abana batanze ubutumwa mu muvugo bujyanye n’Umunsi Mpuzamahanga w’Umwana w’Umunyafurika
