Abagore banyurwa no gukorera ahantu hashyushye !!!

Yanditswe na Olive MUKAHIRWA

Ibyumba byo gukoreramo akazi bikonje ku buryo bukabije bishobora kudafasha abagore gukora akazi neza. Ni ibigaragazwa n’abashakashatsi bo muri Amerika bafatanyije n’abo mu Budage.

Aba bashakashatsi bifashishije isuzuma ry’imibare n’ururimi, abagore babajijwe batanze ibisubizo bizima ni abakoreye mu byumba bishyushye. Mu gihe abagabo bakoreye mu bushyuhe bo batanze ibisubizo bipfuye ku bwinshi. Bahereye kuri urwo rugero, aba bashakashatsi banditse mu gitabo cyabo bise"Plos one" ko ubushyuhe ari mu cyumba cy’akazi ari ingenzi mu bifasha abagore gutanga umusaruro ushimishije.

Mu bushakashatsi habajijwe abagore n’abagabo 500 bahabwa umwitozo w’imibare basubizaga ako kanya bakuye ibisubizo mu mitwe yabo, banabazwa ibibazo bijyanye no kubaka interuro bifashishije amagambo bahawe. Aba babajijwe baciwemo amatsinda ashyirwa mu byumba bifite ubushyuhe butandukanye burimo degree kuva kuri 16 kugeza kuri 32,5.

Ubushakashatsi bwerekanye ko abagore bashyizwe mu byumba bishyushye kurusha ibindi aribo batanze ibisubizo byiza cyane.

NB: Niba ukeneye ko umugore agukorera akazi neza, murinde imbeho mu cyumba umuhaye gukoreramo akazi.